عامرلیاقت کی نازیبا ویڈیوز وائرل کیس؛ ملزمہ دانیہ شاہ کی ضمانت منظور

معروف انکرز پرسن اور سیاستدان عامر لیاقت حسین مرحوم کی نازیبا ویڈیوز وائرل کئے جانے کے خلاف مقدمے میں گرفتار ملزمہ دانیہ شاہ کی درخواست ضمانت کی سندھ ہائی کورٹ میں سماعت ہوئی۔

ملزمہ دانیہ شاہ کے وکیل نے عدالت کو بتایا کہ ایف آئی اے نے ناقص تفتیش کی ہے، دانیہ شاہ کے خلاف کوئی شواہد نہیں ہیں، عدالت عالیہ ان کی موکلہ کی ضمانت منظور کرے۔

فریقین کا موقف سننے کے بعد عدالت نےملزمہ دانیہ شاہ کی درخواست ضمانت پر فیصلہ سناتے ہوئے دو لاکھ روپے میں ضمانت منظور کرلی۔

کیس کا پس منظر

عامر لیاقت کے انتقال سے چند ماہ قبل ان کی چند نازیبا ویڈیوز منظر عام پر آئی تھیں، ویڈیوز منظر عام پر آنے کے بعد وہ مسلسل دباؤ میں تھے۔

عامر لیاقت کی موت کے بعد ان کی بیٹی دعائے عامر نے ایف آئی اے میں ویڈیوز لیک کرنے پر دانیہ شاہ کے خلاف درخواست دی تھی۔

دانیہ شاہ کو ایف آئی اے نے 15 دسمبر 2022 کو لودھراں سے حراست میں لے کر کراچی منتقل کیا تھا۔

جوڈیشل مجسٹریٹ کراچی شرقی کی عدالت میں دانیہ شاہ پر فرد جرم عائد ہوچکی ہے جب کہ ملزمہ نے صحت جرم سے انکار کیا ہے۔

دانیہ شاہ کی ماتحت عدالتوں میں ضمانت کی درخواست مسترد ہوچکی ہیں جس کے بعد انہوں نے سندھ ہائی کورٹ سے رجوع کیا تھا۔