دہشت گردی کے خلاف ہماری جنگ قوم کی حمایت سے جاری رہے گی، آرمی چیف

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل عاصم منیر نے ضلع خیبر کی وادی تیراہ کا دورہ کیا ہے۔ سپہ سالار نے افغان سرحد پر اگلے مورچوں میں تعینات فوجیوں کے ساتھ وقت گزارا۔

ترجمان پاک فوج کے مطابق فیلڈ کمانڈر نے آرمی چیف کو آپریشنل تیاریوں اور سرحدی صورتحال سے آگاہ کیا۔ آرمی چیف نے جوانوں کے بلند حوصلے اور آپریشنل تیاری کی تعریف کی۔

آئی ایس پی آر کے مطابق جنرل عاصم منیر کا کہنا تھا کہ جب تک ہم پائیدار امن اور استحکام حاصل نہیں کر لیتے، دہشت گردی کے خلاف ہماری جنگ قوم کی حمایت سے جاری رہے گی۔ امن کو خراب کرنے والوں کے لیے کوئی جگہ نہیں ہوگی۔

آرمی چیف کا کہنا تھا کہ قبائلی عوام اورفورسزکی بےشمارقربانیوں سے ریاست کی رٹ قائم ہوئی، مادر وطن کے دفاع کو ہر قیمت پر یقینی بنایا جائے گا۔

ترجمان پاک فوج کے مطابق آرمی چیف جنرل عاصم منیر نے کورہیڈکوارٹرز پشاور کا بھی دورہ کیا، پشاور آمد پر کورکمانڈرلیفٹیننٹ جنرل حسن اظہرحیات نے آرمی چیف کا استقبال کیا۔

آئی ایس پی آر کے مطابق آرمی چیف کوآپریشنل، ٹریننگ اور فارمیشن کے دیگر امور کے بارے میں بریفنگ دی گئی جبکہ نئے ضم شدہ اضلاع کی ترقی کیلئے جاری منصوبوں سے بھی آگاہ کیا گیا۔