نواز تو میرا میچ ونر ہے، بابراعظم کی ٹیم کا حوصلہ بڑھانے کی ویڈیو سامنے آگئی

ویڈیو میں محمد نواز کو ڈریسنگ روم کے ایک کونے میں سر پکڑے دیکھا جاسکتا ہے جبکہ دیگر کھلاڑی بھی مغموم بیٹھے ہیں۔

پاکستان کرکٹ ٹیم کے کنسلٹنٹ میتھیو ہیڈن، کوچ ثقلین مشتاق اور کپتان بابر اعظم کھلاڑیوں کو تسلی دیتے اور ہمت بندھاتے نظر آرہے ہیں۔

بابر اعظم نے ڈریسنگ روم میں گفتگو کرتے ہوئے کہا ہم نے کوشش کی ہے اور ہمارے ہاتھ میں کوشش کرنا ہی ہے، کچھ غلطیاں ہوئیں جس سے سیکھنا ہے، گرنا نہیں ہے ابھی ٹورنانمنٹ شروع ہوا ہے ابھی بہت میچز پڑے ہیں۔

بابر اعظم نے کھلاڑیوں سے کہا کسی ایک بندے وجہ سے شکست نہیں ہوئی بلکہ ہم سب ہارے ہیں۔ کوئی کسی پہ انگلی نہ اٹھائے کہ اس نے ہرایا۔ یہ ہماری ٹیم میں نہیں ہوگا، ہم نے اکٹھے رہنا ہے، جو تھوڑی غلطیاں ہیں ہم نے بطور ٹیم ان پر کام کرنا ہے۔

بابر اعظم نے سر جھکائے بیٹھے محمد نواز کو مخاطب کرتے ہوئے کہا کہ نواز تو میرا میچ وِنر ہے۔ ہمیشہ مجھے تم پر بھروسہ رہے گا جو مرضی ہو جائے۔

بابراعظم نے پنجابی زبان میں محمد نواز سے کہا کہ سر جھکانا نہیں ہے تم مجھے اگلے میچ بھی جتواؤ گے۔ بہت اچھی کوشش تھی۔ پریشر والا اوور تھا لیکن آپ اتنا قریب لے کر گئے۔ ویری ویلڈن۔

بابر اعظم کی گفتگو کے بعد ڈریسنگ روم میں موجود کھلاڑیوں نے تالیاں بجائیں۔