اقوام متحدہ نے اپنے ’یو این نیوز‘ کا اردو ورژن لانچ کیا ہے

اس پورٹل میں روزانہ کی خبروں کی اپ ڈیٹس اور ویڈیوز، فیچرز، تصویری مضامین، موضوعاتی فوکس پیجز، اور اقوام متحدہ کے عہدیداروں اور وکلاء کے انٹرویوز شامل ہیں جنہوں نے اقوام متحدہ کے مقاصد کے لیے چھ سرکاری زبانوں – عربی، چینی، انگریزی، فرانسیسی، روسی اور ہسپانوی میں اپنی آواز دی ہے۔
چیئرمین فرینڈز آف کشمیر انٹرنیشنل غزالہ حبیب اور حریت رہنما عبد الحمید لون نے ’یو این نیوز‘ کے اردو ورژن کے اجراء کا خیرمقدم کرتے ہوئے کہا کہ یہ اقوام متحدہ کی دنیا بھر میں اردو بولنے والے سامعین تک رسائی کو وسعت دے گا، اور متعدد زبانوں میں اس کے ابلاغ کے تنوع کو فروغ دے گا۔انہوں نے امید ظاہر کی کہ اقوام متحدہ نے جنوب ایشائی باشندوں کے لئے خصوصی طور پر اردو ورژن کا اجرا کیا ہے جو اس بات کا غماز ہے کہ اقوام متحدہ جنوب ایشیائی ممالک کے مسائل پر سنجیدگی سے توجہ دیتا ہے۔ اسی طرح اس ادارے کو 73 سال قبل کیے گئے اپنے وعدے کا پاس رکھنا چاہیے۔ جس کے تحت 5 جنوری 1949 کو اقوام متحدہ نے کشمیریوں کو ان کا حق خود ارادیت دلانے کی ضمانت دی تھی۔
انہوں نے کہا کہ حق خودارادیت ہر فرد کا بنیادی حق ہے، اس حق سے انکار دراصل انسانی آزادی، انسانی حقوق کے تحفظ و فروغ کے عالمی کنونشنز سے بھی انکار ہے۔