ق لیگ کی پارلیمانی پارٹی نے چوہدری پرویز الٰہی کو مکمل اختیار دیدیا

وزیراعلیٰ پنجاب چوہدری پرویزالٰہی اور مسلم لیگ قائداعظم کی پارلیمانی پارٹی کے لیڈر ساجد بھٹی کی زیر صدارت مسلم لیگ قائداعظم کی پارلیمانی پارٹی کا اجلاس ہوا جس میں سیاسی صورتحال کا تفصیلی جائزہ لیا گیا۔

مسلم لیگ قائداعظم کی پارلیمانی پارٹی نے چوہدری پرویزالٰہی کی قیادت پر بھرپور اعتماد کا اظہار کیا اور تمام فیصلوں کا اختیار وزیراعلیٰ پنجاب کو دیدیا۔

چوہدری پرویز الٰہی کا کہنا ہے کہ عمران خان کے ساتھ دل و جان سے ہیں اور ساتھ دیتے رہیں گے۔

ق لیگ کی پارلیمانی پارٹی نے فیصلہ کیا کہ تحریک عدم اعتماد پر ووٹنگ کی صورت میں وزیراعلیٰ پنجاب چوہدری پرویزالٰہی، اسپیکر پنجاب اسمبلی سبطین خان اور ڈپٹی اسپیکر واثق قیوم کو ووٹ دیں گے۔

ارکان پارلیمانی پارٹی کا کہنا تھا کہ وزیراعلیٰ چوہدری پرویز الٰہی کی قیادت میں مسلم لیگ قائداعظم کی پارلیمانی پارٹی متحد اور یکجان ہے، سیسہ پلائی دیوار کی طرح چوہدری پرویز الٰہی کے ساتھ کھڑے ہیں اور رہیں گے۔

پارلیمانی لیڈر ق لیگ ساجد بھٹی نے کہا کہ وزیراعلیٰ پنجاب چوہدری پرویز الٰہی ہمارے لیڈر ہیں، پوری پارلیمانی، سیاسی اور عوامی قوت کے ساتھ پرویز الٰہی کے شانہ بشانہ ہے، اختلافات کا پروپیگنڈا کرنے والوں کے مذموم عزائم ناکام ہوں گے۔

چوہدری پرویز الٰہی نے مزید کہا کہ مسلم لیگ قائداعظم متحد ہے اور متحد رہے گی، افواہیں پھیلانے والے مخصوص ایجنڈے پر چل رہے ہیں۔

پارلیمانی لیڈر مسلم لیگ قائداعظم ایم پی اے ساجد بھٹی، اراکین پنجاب اسمبلی حافظ عمار یاسر، شجاعت نواز، محمد عبداللہ وڑائچ، محمد رضوان، احسان الحق، محمد افضل، خدیجہ عمر، باسمہ چوہدری اور رکن قومی اسمبلی حسین الٰہی نے بھی اجلاس میں شرکت کی۔