وزیراعظم شہباز شریف سے تاجکستان کے صدر امام علی رحمان کی ملاقات، کئی معاہدوں پر دستخط

بدھ کو وزیراعظم آفس کے میڈیا ونگ سے جاری بیان کے مطابق پاکستانی وزیراعظم اور تاجک صدر کے درمیان ملاقات میں دو طرفہ تعلقات، باہمی دلچسپی کے معاملات اور علاقائی امور پر تفصیلی تبادلہ خیال کیا گیا۔

دونوں رہنماؤں کے درمیان ون آن ون ملاقات کے بعد دونوں ممالک کے درمیان وفود کی سطح پر بات چیت ہوئی، جس میں دونوں ممالک کے درمیان کئی معاہدوں پر بھی دستخط کئے گئے۔

مشترکہ پریس کانفرنس

معاہدوں پر دستخط کے بعد مشترکی پریس کانفرنس میں شہباز شریف کا کہنا تھا کہ تاجک صدر کو دورۂ پاکستان پر خوش آمدید کہتے ہیں، تاجک صدر کے دورے سے پاکستانی عوام خوش ہیں، ان کا دورۂ پاکستان ہمارے لئے باعث فخر ہے۔

انہوں نے کہا کہ پاکستان اور تاجکستان کے دیرینہ تعلقات ہیں، مختلف شعبوں میں دوطرفہ تعاون کے فروغ کیلئے کوشاں ہیں، تاجکستان وسط ایشیا کا اہم ملک ہے، بجلی کے کاسا 1000 منصوبے کی جلد تکمیل کے خواہشمند ہیں۔

تاجک صدر امام علی رحمان کا اس موقع پر کہنا تھا کہ پاکستان کے ساتھ تعلقات کا مزید فروغ چاہتے ہیں، تاجکستان پاکستان کیساتھ تعلقات کو خصوصی اہمیت دیتا ہے، پاکستان اور تاجکستان کے تعلقات تاریخی نوعیت کے ہیں، پاکستان اور تاجکستان یک جان دو قالب ہیں۔

انہوں نے مزید کہا کہ کاسا 1000 سمیت دوسرے منصوبوں کی جلد تکمیل کیلئے کوشاں ہیں، پاکستان کے ساتھ ملکر دہشتگردی سمیت دیگر چیلنجز سے نمٹیں گے، افغانستان میں امن و استحکام کیلئے پاکستان کیساتھ ملکر کام کرینگے۔

اس سے قبل اسلام آباد پہنچنے پرتاجکستان کے صدر امام علی رحمان کا پر پرتپاک خیرمقدم کیا گیا، تاجک صدر کے اعزاز میں باضابطہ استقبالیہ تقریب وزیراعظم ہاؤس میں منعقد ہوئی، وزیراعظم شہباز شریف نے معزز مہمان کا استقبال کیا۔

اس موقع پر مسلح افواج کے چاق و چوبند دستے نے تاجکستان کے صدر کو گارڈ آف آنر پیش کیا، تاجکستان کے صدر نے اپنے وفد کے ارکان کا وزیراعظم شہباز شریف سے تعارف کرایا جبکہ وزیراعظم نے اپنی کابینہ کے ارکان سے انہیں ملوایا۔