شمالی وزیرستان میں خودکش دھماکے سے سیکیورٹی اہلکار سمیت 2 افراد جاں بحق
شمالی وزیرستان میں خودکش دھماکے سے سیکیورٹی اہلکار سمیت 2 افراد جاں بحق ہوگئے۔
پاک فوج کے شعبہ تعلقاتِ عامہ (آئی ایس پی آر) کے مطابق شمالی وزیرستان کے علاقے میران شاہ جنرل ایریا میں ایک دہشت گرد نے خود کو دھماکا خیز مواد سے اڑا دیا۔
خودکش دھماکے میں پاک فوج کے حوالدار محمد امیر اور ایک شہری جاں بحق اور 9 افراد زخمی ہوگئے۔
ملک کی خاطر اپنی جان کا نذرانہ پیش کرنے والے حوالدار محمد امیر کا تعلق میانوالی سے ہے۔
خون کی ہر بوند کا حساب لیں گے
وزیر اعظم شہباز شریف نے میرانشاہ میں خودکش دھماکے کی مذمت کرتے ہوئے جاں بحق ہونے والوں کے اہلخانہ سے ہمدردی کا اظہار کیا ہے، وزیر اعظم نے شہدا کے بلندی درجات اور اہل خانہ کے لئے صبر جمیل کی دعا کی۔
وزیر اعظم نے کہا کہ مسلمانوں پر خودکش حملے کرنے والے مسلمان نہیں ہوسکتے، دشمنوں کے آلہ کار دہشت گرد پاکستان کو عدم استحکام کا شکار کرنا چاہتے ہیں۔
وزیر اعظم نے کہا کہ عوام اور سکیورٹی فورسز نے دہشت گردی کے خاتمے کیلئے قربانیاں دیں،وطن عزیز پر اپنی جانیں نچھاور کرنے والے شہدا کو سلام پیش کرتے ہیں۔
وزیر اعظم نے کہا کہ عوام کے خون کی ہر بوند کا حساب لیں گے، مجرموں کو نشان عبرت بنائیں گے۔