عمران خان نے انارکی پھیلانے کے لئے 3 نام چُنے،وزیرداخلہ

اسلام آباد میں میڈیا سے گفتگو میں رانا ثناء اللہ کا کہنا تھا کہ عدلیہ اور پاک فوج کو اپنی سیاست کیلئے استعمال کرنا ملک کیلئے تباہ کن ہے، پاک فوج ایک منظم ادارہ ہے، کوئی فرد ادارے کی پالیسی کے خلاف جا نہیں سکتا۔

وزیرداخلہ کا کہنا تھا کہ ادارے کی پالیسی کے خلاف جانے والا بچ نہیں سکتا، مزید کہا کہ آرمی چیف کی توسیع سے متعلق ڈی جی آئی ایس پی آر کا بیان کافی ہے۔

راناثناء اللہ نے کہا کہ عمران خان کا چیک اپ غیر جانبدار میڈیکل بورڈ سے کرایا جائے، عمران خان کو4 گولیاں لگی ہوں تو میں سیاست چھوڑدونگا ورنہ عمران کو سیاست چھوڑنا ہوگی۔

ان کا کہنا تھا کہ عمران خان ہمیں مقدمے میں نامزد کرنے کا شوق پورا کرلیں، ہم شامل تفتیش ہونے کیلئے تیار ہیں مگر جتنی مرضی تفتیش ہو جائے، عمران خان پر حملے کا اصل ملزم نوید ہی ہے جسے پی ٹی آئی کارکنوں نے خود ہی پکڑوایا۔

راناثناء اللہ کا کہنا تھا کہ حکومت نے تو مارچ کو مارچ کیلئے تیاریاں کر رکھی تھیں مگر تحریک انصاف کا مارچ تاخیر کا شکار ہو گیا۔

وزیرداخلہ کا کہنا تھا کہ پنجاب حکومت نے مٹھی بھر لوگوں کو احتجاج پر لگایا رکھا ہے اور صوبائی پولیس مٹھی بھر مظاہرین کو سہولت فراہم کر رہی ہے۔