این اے 237 ضمنی انتخاب؛ پیپلز پارٹی کی کامیابی کے خلاف پی ٹی آئی کی درخواست مسترد

سندھ ہائی کورٹ میں قومی اسمبلی کی نشست 237 کے ضمنی انتخاب میں پیپلز پارٹی کے امیدوار عبدالحکیم بلوچ کی کامیابی کے خلاف تحریک انصاف کی درخواست پر سماعت ہوئی۔

چیف جسٹس سندھ ہائی کورٹ نے پی ٹی آئی کے وکیل سے استفسار کیا کہ کوئی بےضابطگی یا دھاندلی ہوئی تو آپ کے پاس الیکشن ٹریبونل جانے کا آپشن ہے، الیکشن کا کیا تنازع لے کر آئے ہیں یہ بتائیں، جو باتیں آپ بتارہے ہیں وہ الیکشن ڈسپیوٹ کے زمرے میں آتا ہے، آپ الیکشن ٹریبونل گئے یا نہیں ؟

پی ٹی آئی کے وکیل نے کہا کہ الیکشن ٹریبونل جانے کا آپشن الیکشن مکمل ہونے کے بعد ہے۔

سندھ ہائی کورٹ نے دلائل سننے کے بعد پی ٹی آئی کی درخواست مسترد کردی۔

16 اکتوبر کو این اے 237 پر ضمنی انتخاب ہوا تھا جس میں پیپلز پارٹی کے عبدالحکیم بلوچ نے عمران خان کو شکست دی تھی۔

تحریک انصاف نے الزام لگایا تھا کہ پیپلز پارٹی نے انتخابی عمل میں دھاندلی کی ہے اور ان کے پاس اس کے ثبوت موجود ہیں۔