وزیراعظم آزاد کشمیر سردار تنویر الیاس خان نے کہا ہے کہ میرپور میں انٹرنیشنل معیار کا ائیرپورٹ تعمیر کریں گے

وزیراعظم آزاد کشمیر سردار تنویر الیاس خان نے کہا ہے کہ میرپور میں انٹرنیشنل معیار کا ائیرپورٹ تعمیر کریں گے اور اگلے ہفتہ میرپور ڈرائی پورٹ کا افتتاح کریں گے۔پی ٹی آئی حکومت نے بلدیاتی الیکشن کروائے ووٹروں کو آزادانہ ماحول میں حق رائے دہی کا موقع فراہم کیا۔گلگت کے لئے بس سروس اہم اقدام ہے۔سندھ حکومت سے دو لاکھ کنال زراعت کی پیدوارکے لئے اور دس ہزار کنال کراچی میں کشمیری کمیونٹی کی رہائشی سہولیات کی اراضی کے حصول کے لئے وزیراعلی سندھ سے بات کی ہے۔کراچی اور سندھ میں کشمیریوں کی بڑی تعداد موجود ہے کراچی میں آباد کشمیریوں کے لئے سندھ حکومت کی طرف سے کبھی کوئی مسئلہ پیدا نہیں ہوا آزاد کشمیر میں سندھ ہاؤس کے لئے 22 کنال ا ور گلگت بلتستان ہاؤس بنانے کے لئے جگہ دے دی ہے۔
ان خیالات کا اظہار انہوں نے دورہ میرپور کے دوران پریس کانفرنس سے خطاب کرتے ہوئے کیا۔اس موقع پر وزیر حکومت چوہدری ارشد حسین،پی ٹی آئی کے مرکزی سینئر نائب صدر چوہدری ظفر انور اور نو منتخب چیئرمین ضلع کونسل راجہ نوید اختر گوگا اور ڈپٹی میئر محمد رمضان چغتائی بھی موجود تھے۔
وزیراعظم آزاد کشمیر سردار تنویر الیاس خان نے کہاکہ میرپور اووسیز کا شہر ہے اس کو میں اپنے ماتھے کا تاج سمجھتا ہوں اس حوالے سے اوورسیز کے مسائل اور شہر کی تعمیر وترقی کے لئے ہر ممکن اقدامات اٹھائیں گے۔ہماری واحد حکومت ہے جس کے صدر، وزیراعظم اور وزراء پر کرپشن کا کوئی الزام نہیں ہے انھوں نے کہا کہ سیاسی جماعتوں کے نظریات الگ الگ ہوسکتے ہیں لیکن دشمنی نہیں ہونی چاہیے ہم نے آزاد کشمیر میں رواداری کی سیاست کو فروغ دیا ہے۔میرپور رٹھوعہ ہریام برج کی تعمیر ہوگی اورمیرپور کے دیگر ترقیاتی منصوبہ جات بھی ترجیحی بنیادوں پر حل کیے جائیں گے۔
وزیر اعظم نے کہا کہ 05اگست 2019کا بھارتی حکومت کا ظالمانہ فیصلہ کشمیریوں کے ساتھ ناانصافی ہے جسے کشمیری کسی صورت تسلیم نہیں کرتے۔انھوں نے کہا کہ بھارت کی طرف سے مقبوضہ جموں و کشمیر میں G20کانفرنس کے انعقاد کی مذمت کرتے ہیں بھارتی زیر قبضہ ریاست جموں وکشمیر اقوام متحدہ کی تسلیم شدہ قراردادوں کے مطابق متنازعہ ہے بھارت کے پاس کوئی اخلاقی،سفارتی اور سیاسی جواز نہیں ہے کہ متنازعہ ریاست میں اس قسم کی کانفرنس منعقد کر وائے۔بھارتی حکمران ہمارے جذبہ ایمان کا امتحان نہ لیں۔بھارت کو اس کاخمیازہ بھگتنا پڑے گا۔انھوں نے کہا کہ اگر چہ سابقہ حکومتوں کی قانون سازی سے احتساب کے عمل کو نقصان پہنچا لیکن ہم آزاد کشمیر میں احتساب کے عمل کو درست کریں گے اور خطہ میں ہماری حکومت کرپشن سے پاک معاشرے کی تشکیل کے لئے کوشاں ہے۔ایک سوال کے جواب وزیر اعظم نے کہا کہ پاکستان کے تمام صوبوں میں آزاد کشمیر کے لوگ مختلف محکموں میں سرکاری نوکریاں کر رہے ہیں۔ہماری کوشش ہے کہ آزاد کشمیر کے گریڈ 20کے افسران ترقیاب ہو کر پاکستان میں اعلی عہدوں پر اپنی خدمات سر انجام دیں۔ انھوں نے کہا کہ آزاد کشمیر کے صحافیوں کو فرائض کی ادا ئیگی کے لیے تمام سہولیات و مراعات دیں گے ان کی رہائشی کالونیاں بھی بنائیں گے اور استعداد کار بھی بڑھائیں گے۔ انھوں نے کہا کہ مہاراجہ کی پنجاب اور دیگر صوبوں میں موجودجائیدادوں کو آزاد کشمیر حکومت کے حوالے کر نے سے کام کر رہے ہیں۔جن پختون بھائیوں نے جنگ آزا دی میں حصہ لیا ان کی یاد گار قائم کریں گے۔ایک اور سوال کے جواب میں انھوں نے کہا کہ حکومت آزاد کشمیر نظام تعلیم میں بہتری لا رہی ہے خواتین کے تعلیمی اداروں میں کیمروں کی تنصیب شروع کروا رہے ہیں اور مخلوط تعلیمی اداروں میں خواتین اساتذہ کے لیے پردے کا اہتمام بھی کر وارہے
ہیں۔تعلیمی اداروں کی عمارات کو بہتر بنارہے ہیں۔تعلیمی اداروں سے بچوں پر تشدد کرنے کے خلاف سخت کاروائی عمل میں لائی جا رہی ہے۔
میرپور(پی آئی ڈی)07 مارچ 2023
وزیراعظم آدکشمیر سردار تنویر الیاس خان کا برصغیر کے عظیم روحانی پیشواء حضرت بابا پیرا شاہ غازی المعروف دمڑی والی سرکار ؒکے سالانہ عرس کے موقع پر دربار عالیہ کھڑی شریف حاضری،دربار شریف کو عرق گلاب سے غسل دینے اور چادر پوشی کی اس موقع پر کھڑی شریف دربار کی تعمیر کے لیے 5کروڑ اور یتیم بچیوں کی اجتماعی شادیوں کا بھی اعلان کیا۔انہوں نے یتیم بچیوں کی شادیوں کے لئے اہل ثروت سے کہاکہ وہ اپنی بساط اور اخلاص کے مطابق اس نیک میں بڑھ چڑھ کے حصہ لیں۔
وزیراعظم آزاد حکومت ریاست جموں و کشمیر سردار تنویر الیاس خان نے وزراء کرام کے ہمراہ برصغیر کے عظیم روحانی پیشواء حضرت بابا پیراشاہ غازی المعروف دمڑی والی سرکارؒ کے سالانہ عرس کے موقع پر دربار شریف کو عرق گلاب سے غسل دیا اور دعا کی۔وزیر اعظم نے عارف کھڑی حضرت میاں محمد بخش ؒکے مزار پر بھی حاضری دی انہوں نے مزارات پر پھول اور چادریں چڑھائی اور بزرگان دین کے درجات کی بلندی کے لئے دعائیں کیں انہوں نے عرس کے انتظامات کا بھی جائزہ لیا اور زائرین کو ہر طرح کی سہولیات و مراعات فراہم کرنے کی ہدایات دیں۔وزیر اعظم آزاد کشمیر نے مزار کی تعمیر کے لیے اپنی طرف سے 5 کروڑ کا اعلان کیا اور مزار کے احاطے میں دعویٰ اکیڈمی اور یتیم بچیوں کی اجتماعی شادیاں کرانے کا بھی اعلان کیا۔اس موقع پر وزراء حکومت علی شان سونی، چوہدری ارشد حسین،حافظ حامد رضا،معاونین خصوصی راجہ سبیل ریاض،توصیف عباسی،وارث گیلانی،ڈویژنل و ضلعی انتظامیہ کے افسران اور زائرین کی بڑی تعداد بھی موجود تھی۔
میرپور (پی آئی ڈی)07مارچ2023ء
وزیراعظم آزاد کشمیر سردار تنویر الیاس خان نے دورہ میرپور کے دوران آزاد کشمیر میں کامیاب بلدیاتی انتخابات کے انعقاد اور بھاری تعداد میں پی ٹی آئی کے کامیاب ہونے والے کونسلرز کے اعزاز میں شہریوں کی جانب سے 32پاؤنڈکا وزنی کیک کاٹا اس موقع پر وزراء حکومت،معاونین خصوصی،بلدیاتی اداروں کے نومنتخب کونسلرز اور پی ٹی آئی کے کارکنان کی بڑی تعداد موجود تھی۔