عدالت کا شہریوں کی گمشدگی پر فوری مقدمہ درج کرنے کا حکم

سندھ ہائی کورٹ میں آج بروز جمعہ 20 جنوری کو لاپتا افراد کی بازیابی سے متعلق درخواستوں کی سماعت ہوئی۔

سندھ ہائیکورٹ کے جسٹس نعمت اللہ نے لاپتا افراد کی بازیابی سے متعلق درخواستوں پر سماعت کی۔

جسٹس نعمت اللہ نے شہریوں کی گمشدگی پر فوری مقدمہ درج کرنے کا حکم دیتے ہوئے کہا کہ جس علاقے سے شہری لاپتہ ہوں متعلقہ تھانے میں فوری مقدمہ درج کیا جائے۔

عدالت نے ایس ایچ او شاہ لطیف کو حکم دیا کہ لاپتہ شہری میر علی حیدر کی گمشدگی کا مقدمہ درج کر کے تحقیقات کی جائیں۔

سندھ ہائیکورٹ نے لاپتا شہری حیدر علی کی فوری بازیابی کا حکم دے دیا جبکہ درخواست گزار کے وکیل نے بتایا کہ لاپتا شہری منظور احمد گھر واپس آ گیا ہے۔

وکیل درخواست گزار کا کہنا تھا گمشدگی کے دوران منظور احمد کے خلاف مقدمات درج کر لیے گئے، عدالت نے اسٹیل ٹاؤن سے لاپتا ہونے والے شہری منظور احمد کی گمشدگی کی درخواست نمٹا دی۔   اس موقع پر سندھ ہائی کورٹ نے شہریوں کی گمشدگی پر فوری مقدمہ درج کرنے کا حکم دے دیا۔