جموں وکشمیر کے عوام کے بنیادی حق خودارادیت کے حصول کی جدوجہد

جموں وکشمیر تحریک حق خودارادیت انٹرنیشنل کے بانی چیئرمین راجہ نجابت حسین نے کہا ہے کہ ریاست جموں وکشمیر کے عوام کے بنیادی حق خودارادیت کے حصول کی جدوجہد میں کشمیری یوتھ بنیادی اور فیصلہ کن کردار ادا کر سکتی ہے، یوتھ کی آواز کو دنیا کے اندر توجہ سے سنا جاتا ہے،اس وقت دنیا بھر میں بھارت کے گھنا ؤنے چہرے کو بے نقاب کرنے کی ضرورت ہے جس کے لیے ہمیں آپس میں تعاون اور اشتراک سے اپنے کام کو آگے بڑھانا ہو گا۔ان خیا لات کا اظہارچیئرمین تحریک راجہ نجابت حسین نے مظفرآباد کے دورے کے دوران سکالر یوتھ فورم اور جموں وکشمیر تحریک حق خودارادیت انٹرنیشنل کے درمیان ایک مشترکہ خصوصی نشست میں کیا۔ راجہ نجابت حسین اور ڈپٹی لارڈ مئیر مانچسٹر و چیئرپرسن تحریک حق خودارادیت برطانیہ کونسلر یاسمین ڈار جب اپنی ٹیم ممبران کنول حیات کشمیری، اور شکیل عباسی کے ہمراہ اس مشترکہ نشست میں شرکت کے لیے پہنچے تو  چیئرمین سکالرز فاؤنڈیشن افتخار حسین کاظمی، سکالر یوتھ فورم کے صدر حسن عسکری اور دیگر عہدے دارا ن نے اُن کا استقبال کیا۔

 اس مشترکہ میٹنگ میں ڈپٹی لارڈ مئیر مانچسٹر کونسلر یاسمین ڈار، افتخار حسین کاظمی چئیرمین سکالر فاؤنڈیشن، سمیعہ صدیق پرنسپل سکالرز کالج آف سائنسز،سکالر یوتھ فورم کے صدر حسن عسکری، اسامہ بن حسن (سینئر نائب صدر) مس نور العین فاطمہ (نائب صدر) عمیر چوہدری (جنرل سیکرٹری) سیدہ نور فاطمہ (ڈپٹی جنرل سیکرٹری) شعیب قریشی (سیکرٹری فنانس)عمارہ عباسی (ڈپٹی سیکرٹری فنانس) حمزہ خواجہ (ایونٹ کوآرڈینیٹر)سنابل عباسی (ڈپٹی ایونٹ کوآرڈینیٹر) احمد بھٹی (سیکرٹری سپورٹ)نے شرکت کی اور مسئلہ کشمیرکی تازہ ترین صورتحال  سے متعلق تفصیلی تبادلہ خیالات کیا۔ تحریک حق خودارادیت کے چیئرمین راجہ نجابت حسین اور کونسلر یاسمین ڈار نے برطانیہ اور یورپ میں مسئلہ کشمیر پر کیے جانے والے کام، ممبران پارلیمنٹ و ذرائع بلاغ کے نمائندوں سے رابطوں، کشمیریوں کے حق خودارادیت پر لابی کے لیے کیے جانے والے اقدامات سے سکالر یوتھ فورم اور سکالر فاؤنڈیشن کے عہدے داروں کو آگاہ کیا اور اس بات پر زور دیا کہ نوجوانوں کو تحریک کے اس پروگرام میں باضابطہ شریک کرنے کی ضرورت ہے۔ راجہ نجابت حسین کہا کہ ان کی تنظیم اقوام متحدہ کے تحت کشمیری عوام کے بنیادی حق خودارادیت کے لیے گزشتہ 30سالوں سے برطانیہ و یورپ  اور دنیا کے دیگر ممالک کے علاوہ پاکستان اور آزاد کشمیر کے نوجوانوں اور خواتین کی مختلف تنظیموں کے ساتھ مل کر کام کر رہی ہے۔انہوں نے اپنی تنظیم کی جدوجہد کے بارے میں اپنے تجربات بھی شیئر کیے۔انہوں نے کہا کہ ترقی پذیر معاشروں اور اقوام میں خواتین کو بااختیار بنایا جا رہا ہے،مقبوضہ جموں وکشمیر میں بھارتی فورسز کے مظالم اور بربریت کو دنیا بھر کے اندر بت نقاب کرنے میں خواتین ہراول دستے کا کردار ادا کر سکتی ہیں، ہماری تنظیم تحریک حق خودارادیت نے اس وقت تک مسئلہ کشمیر کے حوالے سے جو اہداف کامیابی سے حاصل کیے ہیں ان میں خواتین کا بنیادی رول رہا ہے۔ سکالرز فاؤنڈیشن اور سکالریوتھ فورم کے ذمہ داران نے ا پنی تنظیم کے مستقبل کے منصوبوں سے راجہ نجابت حسین اور اُن کی ٹیم کو آگاہ کیا۔باضابطہ میٹنگ کے بعد ایک مباحثہ سیشن بھی ہوا جس میں سکالرز یوتھ فورم کے ٹیم ممبران نے مسئلہ کشمیر اور انسانی حقوق سے متعلق آگاہی کے لیے  مختلف اہم سوالات بھی کیے۔تحریک حق خوداردیت کے بانی چیئرمین راجہ نجابت حسین نے اجلاس میں سکالرز فاؤنڈیشن کے بے مثال کام کو سراہا۔اور مستبقل میں کچھ مزید منصوبوں پر مل کر کام کرنے میں گہری دلچسپی ظاہر کی۔ اجلاس کے آخر میں چیئرمین سکالرز فاؤنڈیشن افتخار حسین کاظمی اور پرنسپل سکالرز کالج کی طالبہ محترمہ سمیعہ صدیقی نے معززمہمانوں کو اعزازی شیلڈز پیش کیں۔جموں وکشمیر تحریک حق خودارادیت انٹرنیشنل کے چیئرمین راجہ نجابت حسین نے سکالر یوتھ فورم کے نومنتخب عہدے داران اور کیبنٹ ممبران سے حلف وفاداری بھی لیا۔