عمران خان کا پولی گرافک ٹیسٹ کرانے کی درخواست سماعت کیلئے منظور

انسداد دہشت گردی عدالت گجرانوالہ میں عمران خان فائرنگ کیس کی سماعت ہوئی۔ ملزم نوید بشیر کی طرف سے میاں داؤد ایڈووکیٹ نے دلائل دیے۔

عدالت نے عمران خان کا پولی گرافک ٹیسٹ کرانے اور ایف آئی آر کے تمام زخمیوں کے پولی گرافک ٹیسٹ کرنے کی درخواست پر نوٹس جاری کردیا۔

ملزم نوید کے وکیل کی درخواست پر عمران خان، اعجاز چوہدری سمیت تمام زخمیوں کے موبائل قبضے میں لینے کی درخواست پر بھی نوٹس جاری کردیا گیا۔

وکیل ملزم میاں داؤد نے کہا کہ مقدمے میں جے آئی ٹی اصل ثبوت اکٹھے نہیں کر رہی، عمران خان سمیت دیگر زخمیوں کے موبائل فونز فوری قبضے میں لئے جائیں۔ جے آئی ٹی اس مقدمے کی تفتیش میں ملزم نوید کے ساتھ امتیازی سلوک کر رہی ہے، میاں داؤد نے کہا کہ وقوعہ کے زخمیوں کی میڈیکل رپورٹس ملزم کو مقدمے کی پیروی کیلئے درکار ہیں۔

عمران خان سمیت تمام زخمیوں کی میڈیکل رپورٹس ملزم کو فراہم کرنے کی درخواست پر عدالت نے نوٹس جاری کر دیا اور حکم دیا کہ تمام 6 درخواستوں میں 19 جنوری تک جواب جمع کرایا جائے۔