پاکستان میں 10 ارب ڈالر تک سعودی سرمایہ کاری کا امکان

سعودی خبر ایجنسی سعودی گیزیٹ کے مطابق سعودی ولی عہد شہزادہ محمد بن سلمان نے پاکستان میں سرمایہ کاری میں اضافے کا جائزہ لینے کی ہدایت کر دی ہے۔

رپورٹ میں کہا گیا ہے کہ سعودی عرب کی جانب سے پاکستان میں سرمایہ کاری 10ارب ڈالر تک لے جانے کیلئے اسٹڈی ہوگی۔

خبر ایجنسی کے مطابق ولی عہد محمد بن سلمان نے سعودی ڈویلپمنٹ فنڈ کو پاکستان سینٹرل بینک میں جمع کروائی گئی 5 ارب ڈالر کی رقم بڑھانے پر جائزہ لینے کی بھی ہدایت کر دی ہے۔ سعودی میڈیا کا کہنا ہے کہ دسمبر 2022 میں اسٹیٹ بینک میں ڈیپازٹ کی رقم 5 ارب ڈالر کر دی گئی تھی۔

رپورٹس کے مطابق سعودی ولی عہد اور وزیراعظم شہباز شریف کے درمیان حالیہ روابط کے تناظر میں یہ اعلان سامنے آیا ہے۔

واضح رہے کہ سعودی عرب نے گزشتہ سال پاکستان میں 10 ارب ڈالر کی سرمایہ کاری کا اعلان کیا تھا، جب کہ دسمبر میں 3 ارب ڈالر ڈیپازٹس کی واپسی میں توسیع کی تھی۔