پاکستان کے زرمبادلہ ذخائر 10 ارب ڈالر ہیں، اسحاق ڈار

اپنے بیان میں وفاقی وزیر اسحاق ڈار نے کہا کہ دوست ممالک سے فنڈ آنے پر ذخائر جلد مستحکم ہوں گے، آئی ایم ایف کا وفد جلد پاکستان کا دورہ کرے گا۔

پاکستان کے زرمبادلہ ذخائر سے متعلق وزیر خزانہ نے کہا کہ سعودی عرب سمیت دیگر دوست ممالک سے فنڈز منتقلی پر یہ ذخائر بہت جلد مستحکم ہوں گے۔

انہوں نے کہا کہ پاکستان کےذمہ واجب الادا قرض بروقت واپس کیا جا رہا ہے، حالانکہ امریکا سمیت کسی بھی ملک کے قومی قرضے میں کمی نہیں آئی۔ اسحاق ڈار نے یہ بھی بتایا کہ قرض واپس کردینے کے بعد دوبارہ حاصل کرنا ایک وقت طلب کام ہے۔

واضح رہے کہ وزیر خزانہ جنیوا کانفرنس کے بعد 3 روزہ سرکاری دورے پر متحدہ عرب امارات بھی جائیں گے۔

پاکستان میں نمائندہ آئی ایم ایف کا بیان

دوسری جانب پاکستان میں نمائندہ آئی ایم ایف ایسٹر پیریز ( Esther Perez ) کا اپنے بیان میں کہنا ہے کہ وزیراعظم شہباز شریف سے ایم ڈی آئی ایم ایف کی تعمیری بات چیت ہوئی۔ ایم ڈی نے سیلاب متاثرین سے اظہار ہمدردی بھی کیا۔

آئی ایم ایف ترجمان نے بتایا کہ جنیوا میں بین الاقوامی کانفرنس لچکدار پاکستان کے سلسلے میں ہو رہی ہے۔ آئی ایم ایف پاکستان کی سیلاب سے پائیدار بحالی کی مدد کرتا ہے۔

نمائندہ آئی ایم ایف نے مزید بتایا کہ جنیوا میں بین الاقوامی کانفرنس پاکستان کے سیلاب زدگان کی مدد کیلئے ہی ہو رہے، جس میں وزیر خزانہ اسحاق ڈار سے آئی ایم ایف وفد کی ملاقات اور نمایاں مسائل پر بات چیت متوقع ہے۔