رمیز راجہ کا فیورٹ منصوبہ پی جے ایل کرکٹ بورڈ کا خزانہ خالی کرگیا

پاکستان جونیئر لیگ سے پی سی بی کو اسپانسرز کی مد میں صرف 19 کروڑ کی انکم وصول ہوئی، پی جے ایل پر پروڈکشن کے اخراجات 28 کروڑ سے زائد کے آئے تھے جبکہ کھلاڑیوں اور سپورٹ اسٹاف کو میچ فیس کی مد میں 44 کروڑ 28 لاکھ 60 ہزار روپے ادا کئے گئے۔

رپورٹ کے مطابق پی سی بی نے کھلاڑیوں اور سپورٹ اسٹاف کو ڈیلی الاونس کی مد میں 2 کروڑ 7 لاکھ روپے ادا کئے، کمرشل اور کرکٹ آپریشنز کی مد میں 19 کروڑ 93 لاکھ ادا کئے گئے، سیکیورٹی پر 2 کروڑ جبکہ لاجسٹکس پر 14 کروڑ 89 لاکھ 20 ہزار 400 کے اخراجات آئے۔

اعداد و شمار کے مطابق پی جے ایل کیلئے ایڈمنسٹریٹو اخراجات 2 کروڑ 56 لاکھ 36 ہزار جبکہ لیگل اخراجات پر 75 لاکھ روپے خرچ کئے گئے، میڈیا کی مد میں 90 لاکھ 80 ہزار جبکہ فنانس اور ایچ آر کے 70 لاکھ روپے ادا کئے گئے، سابق چئیرمین نے ایمرجنسی کیلئے 2 کروڑ روپے مختص کروائے۔

پاکستان جونئیر لیگ میں کل اخراجات 90 کروڑ 9 لاکھ 96 ہزار کے ہوئے۔ پاکستان جونئیر لیگ کی وجہ سے پی سی بی کو کل 99 کروڑ 69 لاکھ 96 ہزار 400 روپے کا خسارہ ہوا۔

پی سی بی کی مینجمنٹ کمیٹی نے پاکستان جونئیر لیگ کے بڑے خسارے پر پریشانی سے سر جوڑ لیا۔

ذرائع کے مطابق مینجمنٹ کمیٹی نے سابق چیئرمین پی سی بی رمیز راجہ کیخلاف کارروائی کرنے کا فیصلہ کیا ہے۔ مینجمنٹ کمیٹی رمیز راجہ کی بنائی ہوئی پی جے ایل کیخلاف ایف آئی اے سے بھی رجوع کرے گی۔